رام الله: نعت فاتن كبها، ابنة الفنان شفيق كبها، والدها عبر حسابها على فيسبوك، بصورة له مبتسماً مع والدتها وحفيدتهم، ابنة فاتن.

وكتبت فاتن كلمات حزينة قالت في مضمونها إنها لا تريد أن تضع صور سوداء أو أن تعلن الحداد، بل ستنشر صورة له يضحك سعيداً بحفيدته ومع شريكته زوجته.

وكتبت فاتن  تصف صبر والدتها على فقدان زوجها المغني الشعبي قبل أيام قليلة قتيلاً برصاص مجهولين "بديش أحط صورة سودا بديش اللون المتشائم، بدي أحط صورة الك وأنت تضحك ومبسوط ومش سايعتك الدنيا معك حبيبة عمرك ورفيقة دربك ونصك الثاني، الي بتموت عليك الي بتنام وبتصحى تترضى عليك وتتمنالك الجنة واللي لما شافتك بلمغتسل ..ابتسمتلك 

يا الله يابا مقواها رفيقة عمرك يا الله شو صبوره يا الله محلاها وهي تترضى عليك ..نيالك عليها".

وتحدّثت عن حب كبها لحفيدته وحبها له "وديوره (ديار) الي دخلت ع قلبك الفرحه من جديد ..حفيدتك الاولى، من امبارح وهي كل ما تمرق من حد غرقتك بتطلع علينا وبتقلنا "هووووووش" مع حركة الاصبع تاعتها وبتقول "تيدي نايم ".

ووصفت ابنة كبها افتقادها لوالدها فجأة في كلمات أحزنت المتابعين لها على حسابها الشخصي على فيسبوك والذين عبروا عن تضامنهم معها ومع عائلتها،  "يا الله شو دورت عليك بالدار وبغرفتك وبحمامك وع كنبايتك، وبس شافت صورتك بوستها ورفعت ايدها ورقصتلك ..زي ما كنت تعملها، حببتها بلفرحه والرقصه والأغنية ..حببتها بالحياة، زي ما حببتنا فيها واحنا بقمة الحزن بقمة الفقدان بقمة الاااا الااا شعور".

وأضافت فاتن كبها، "نيالك ع محبة العالم، نياااااالك ..كل الدنيا ترحمة عليك وعيطت عليك وتمنتلك الجنة .

فرحت كل العالم وجوزت كل العالم ورقصتة وزغردتلهم وجوزت الابو والابن وابن الابن ..فرحتهم بس همي بكونا".

"نااام تحت التراب وابتسم ابتسم ابتسم واحنا فوق التراب رح نبتسم حتى مع الألم والحزن وكل اشي رح نبتسم عشانك يا عمري عشانك يا روحي عشانك يا قلبي عشانك ..عشانك يلي أخذت روحي معك، عشانك يلي شلعتلي قلبي  ..شهيد الأغنية/أبوي".

وكان الفنان الشعبي الفلسطيني شفيق كبها، لقي مصرعه برصاص مجهولين، أصابوه إصابة حرجة على مدخل أم الفحم بالداخل المحتل، توفي لاحقاً متأثراً بها في المستشفى.