مش لاقي عنوان

بصراحة مش عارف شو احكي ولا شو اكتب ... المشكلة الواحد من كتر ما بشوف بهالبلد بطل يقدر يفكر ولا من وين يقطبها...

خلينا نحكي شوي بصراحة وشفافية مش هيك بحكوا؟؟؟؟

موضوع الغلاء المعيشي الفاحش الي احنا عايشين فيه كيف اجا من وين اجا مش عارف ... الكل بحكيلك الدنيا غليت كيف ؟؟؟ يعني الخيار تاع السنة خيار موديل 2012 عشان هيك غليان ولا البندورة ولا الكوسا ولا الفواكه الي صارت كماليات بلبيت الفلسطيني ...

الكهرباء ضافو عليها ضريبة النفايات ... " شر البلية ما يضحك" هلا اعطيني منطة وحدة بكل فلسطين نظيفة كما يجب ... اذا حاويات الزبالة مش بس وسخة وكمان مكسرة على اي اساس في ضريبة نفايات ؟؟؟

الشوارع مكسرة وبحكيلك مشاريع شغالة ... من اكتر من 10 سنين وبحكو مشاريع شغالة وبصلحوا بالشوارع ... يا جماعة بكفي من كتر ما في رقع بالشوارع صار الشارع متل الحمار الوحشي مرقع ... سيارتي مشيت على الشارع بس كم شهر صارت بدها تغيير قطع بملغ وقدره ... طيب ليش مشاريع الشوارع ما بضيفوا عليها تصليح السيارات ؟؟؟

يا جماعة المشكلة انو في بعض ناس مش حاسين بمعاناة اكثر من 90% من الشعب ...

قال ايش .. بدهم يقلصوا عدد الموظفين ويعطوهم تقاعد نص راتب ... بالله عليكم ما هو اشي بضحك وببكي بنفس الوقت ... افهم كيف ؟؟؟ كل الموظفين بلا استثناء عليهم التزامات اكثر من رواتبهم ... مثلا موظف عليه التزامات بقيمة 3000 شيكل غير مصروف البيت وراتبة 4000 مع العلاوات لما يقاعدووه ويصير ياخد نص الراتب الاساسي الي هو تقريبا 3200 شيكل يعني لما يصير ياخد 1600 شيكل من وين بدو يجيب مصروف البيت والالتزامات ... الحل الوحيد انو رح يصير حرب اهلية وكل واحد بدو حقوا ولا شو رايكم ؟؟؟؟

يعني كل اسعار السلع الاساسية والثانوية بصعود الا الراتب ثابت اذا ما نزل

والمصيبة ما بتسمع الا دولة كذا تبرعت بمبلغ ابو الست صفار ودولة كذا كمان دفعت مبلغ ضعفوا ومبالغ الله اعلم من وين ... الفلم الهندي انو بالاخر بحكيلك عنا عجز بالميزانية كيف ؟؟؟

انا ما بدي احكي كتير عن موضوع البطالة لانو الكبير والمقمط بلسرير حكى عنو وبالاخر على الفاضي كانك بتنفخ بقربة مخزوقة ... مثلا اخوي في بداية الازمة المالية العالمية فنشوا الشغل بالامارات ... اجا على البلد سنة "سنة كاملة" دور على شغل ما لقى رجع على الامارات واشتغل براتب نص الراتب الي كان ياخدة بس عشان ما يحكي لابوي اعطيني مصروفي ... امتا بدنا نحل هالقصة ...

الناس الي بتشتغل ... اجا قرار خارجي بوقف الدعم عن بعض مشاريع المنظمات الغير حكومية ... بالاخر عدد كبير من الموظفين بدون شغل ... هدول رح يسجلوا حضور وغياب في مكتب العمل الي الله واعلم شو بشتغل ... ناس مخلصة جامعات بتنزل على دولة الاحتلال تشتغل عشان تجيب مصروف بيتها ...

والله العظيم انو شي بهبل ... شو نسوي مش عارف ...

لا والاسواء من هيك بطلع وزير بسب على الموظفين وزيرة مش عارفة شو بتشتغل ووزير علي قضايا فساد ... ولا وزارة بالبلد شغالة صح ليش ؟؟؟ وين الرقابة الي بس محطوطة على رقبة المواطن ... على اقل شي بنفضح عرض المواطن ... مثلا مخالفة سير ... القاضي بسالو مذنب ولا غير مذنب ... ولازم الجواب مذنب لو شو ماكان عامل ويا ويل امو لو حكى حرف غير مذنب غضب عبد الله بنزل عليه ...

التعليم وما ادراك ما التعليم ... معلمين وانا بصراحة لا اسميهم معلمين بل مخربين ... كل المعلمين مخربين مدمرين اجيال الا من رحم ربي وهم قلال ... يا جماعة التعليم صار بالحضيض اذا الاشخاص الي هم المفروض معلمين بكونوا بالمدارس يتصرفوا كانهم صايعين بالشوارع من تصرفات ما انزل الله بها من سلطان ... تدخين ، مسبات وسخة، ضرب ، تشهير ، اتهام للطلاب بالسرقة ... وقال بحكيلك مال الطلاب ما بدهم يتعلموا لما الاستاذ والطالب بعزموا على بعض سجاير بالمدارس ... وبالاخر الوزيرة بتحكيلك "انا مثالية اكثر من اللازم ، بنيت اكثر من 300 مدرسة " يعني هي دافعة من جيبة ابوها ؟؟؟؟؟؟؟؟

الصحة ههههههه بس حد يحكي قدامي صحة ومديريات الصحة بفقع ضحك ... مديرية صحة ما فيها ادوية ما فيها معدات لازمة ما فيها كفاءات وكوادر بتشتغل صح ... مئات حالات الوفاه نتيجة خطأ طبي وبالاخر الدكتور بكون بمنصب وبصير بمنصب اعلى منو ... هلا رح تحكولي يا راجل بتبالغ ... يمكن انا جاي من المريخ ومش شايف "يمكن"

الاقصاد = فقط ضريبة ... بدنا نشف دم المواطن ... بدنا نشفط مصاريه

وبالاخر بحكيلك دولة فلسطين قربت ... والله الي قرب انحسار و تلاشي المواطن ... ممكن حد يحكيلي اذا في احصائية للناس الي بتطلع من البلد وما بترجع ... وين بروحوا وليش بروحوا ولا احكيلكم " بخففوا " بلا منهم ....

المصالحة هي هي ... الشعب صار شعبين والبلد صارت دولتين والي بحرق القلب العالم بطل يعترف فينا الا لتحكيلو من اي دولة انتا ... انا ما بحكي شي من الخيال انا صارت معي بمطار البرازيل ... سالتني البنت بالمطار انتا من اي دولة بفلسطين :( بالله عليكم شو بتشغل سفارة فلسطين بالبرازيل ؟؟؟ بالله عليكم شو الواحد يحكيلها ... والله العظيم شوي وكان ضربتها ...

وانا بحكي لكل واحد عم بدمر بالشعب الفلسطيني وصموده رح يندم رح يندم رح يندم ... والتاريخ لن يرحم احدا ...